| L'ha finì da batti ul so tié, par dila a üsanza da Busti. Ma intratantu che noeun, squasi tüci, a lassam a nostra cà e a fam u ültam viagiu a cà dul Bìa muci muci, senza scumudà tropo i egenti, par lü s'é moeusta tuta a cità, sciui e poaiti, grandi e pisciniti, Sendagu e Preostu, deputà e senadui, industriai, marcanti e lauanti, predi e frà e monighi, i fioeu di esili e di scoeui, i urfanèi e i vegi dul ricoar, in pochi paòl tüti chi chi pudéan andaghi dré a faghi i unuranzi e a dighi pa a ültima voeulta : Adiu Pà Carloeu. Ti se fèi in quattar par noeun e candu gh'ea a guèra e dopu, in Cumoeun e foeua : ti se stèi par noeun na pruvidenza candu gh'ea chi i tudeschi, e sempar ti se mustrà un bon büstocu, lavuadùi e amisi di lavuadui, e tuta genti unesta la t'à sempar vurzü ben. Noeun ta rinraziam, e ta regordaèm fin al di dul giüdizi, ma ul Signui al ta daà a giusta paga par chel bòn ca te fei. Insc“ i diséan cont aa buca, o cont ul coeui tuti i person ch'andea dadré aa carocia tüta piena da curonn dul Municipi, di sociazion, di amisi. E una voeulta tantu l'ea propri a verità. Ma mén, intantu che ul poar Pa Carloeu al fea pa a ultima voeulta ul giro da a so Busti, e al paséa danànzi al Monumentu, ho credü da vidé saltà foeua da chel truncòn
|
da marmu tutti i nostar morti da chèla guèra dul quindas-dasdotu cha l'à vüstu, lü inscì giùan, diventà ul pà da tüci e fass in quˆtar parchè i fioeu da Büsti ch'ean al fronti sa sentissan süstegnüi, e fa gruppu inturnu al càru e cantaghi a canzon dul Piave. Ma ammò pussé bel l'é stèi candu ul curtèu l'ha rasentà a Santa Maia. Tutt'an trattu una gran lüsi rusa tèm un foeugu l'ha vistì tüta a gésa e da déntar s'é sentü vignì una vusi dulza dulza cha l'ha di : O car ul me Pà Carleou ti m'é vuü ben in vita, e men ta veouu ben in morti. Inscì m'è parsu da sentì e anche s'ho sugnà, l'é vea non fursi ch'ul nostar Pà Carleou e a Madona du aüitu éan amisi e sa vuéan bén tantu che lu la fèi ul libar sü a Mamma di Bustochi? Ma m'acorgiu da fala tropa longa e ch'un chei voeun al ridi di me panzànighi. E püi, propi in stì amui da fedi da patria e da famiglia, in sti sentimenti da om ch'al sé fei da par lü, e al se dèi inturnu pa ütà i oltar a sulevàssi da a miséa, da büstocu inamuà da a so cità cha l'ha vurzü celebrà anca cont aa pèna, propri par sti virtü mèn a credu che 'l nostar Pà Carleou al resterà vivu un bèl pèzu in mezu a tuci noeun.
VOEUN DA BÜSTI
Tratto dall'ALMANACCO DELLA FAMIGLIA BUSTOCCA per l'anno 1959
a cura di Giorgio Giacomelli.
|
