Prima da Pasqua - di Luigi Caldiroli - poesia dialettale in Bustocco

Prima da Pasqua


Dòpu mési da frègiu e da scighéa,
chi dí da primaéa
da a Setimána Sánta,
un témpu pa’ i fioêu
éan fúrsi püsé bèi da chi d’incoêu.
Chan cúri cha sa féa
par vèsi lá danànzi sü i bancón,
curiúsi cun dulúi
a ‘idé mazá ul Signúi!
Chèl bòia d’un Tuloêu (1),
l’ho pròpi ‘üstu mén! –
a cúlpi da scuén,
o génti, ma ‘l ga déa
al nóstar bón Preustón (2),
lá, mògiu, ritiá in dul só cantón!
In gíru alúa sa stéa e úi e úi
a fágh’ ul nòs basén
a tánti pòr Signúi
sperdüi
sü ‘l sfóndu d’un viulèta da paadüi.
San Ròcu, Sánta Crúsi, San Gregói,
e gési gròsi e gesioêu da pòi,
éan tápi tüti bèi, tüt ‘ubligái
par vèghi a perdunánza di pecái.
A pasá via di piánti sa ‘scultéa
se un cáj üsèl gilòcu al ciciaréa.
In dul silénziu mütu da chi úi,
che pèna, che dulúi!
Ma, a díla tra da nêun, in veitá,
che voêuia da pestá
chi brüti fáci spúrchi di giüdé,
a guárdia dul Signúi
in gésa San Miché!
Al sábatu, ul dí dòpu, gh’éa da ‘ndá,
un pestunén in mán,
dafoêua dul Batistéi da San Giuán,
in fía,
a pèrdi nón u áqua benedía.
A’ a príma scampanáa,
i êugi sa bagnéa
e, alè,
a ‘usá, a fá rabèl,
da tòni, a guardá in l’áia par vidé
sü i nüvul sguá ul Signúi dasuá dul Cièl.
Móndu beátu!
Chi dí lasái luntán, da primaéa,
chi dí chan’ sa specéa
dumá un uén spalmá da ciculatu,
par i fioêu
éan fúrsi püsé bèi da chi d’incoêu.


1) Sacrista della Basilica di San Giovanni
2) L’indimenticabile Monsignor Borroni


Selezione e digitalizzazione di Angelo Crespi


Altre composizioni di Luigi Caldiroli