UL BALÖSU

Stamattina ho tiá föa a bicicleta, parchè u aria a la s’é slargá föa.
Men cha a som d’un òla generazion, d’invernu a dröu pü a bicicleta, a vo in machina !
A passu in fondu a strá Magenta.
A disu 'in fondu' parchè par men, cha a som da Sinagu, ul fondu al é in du’ cha a la cumencia !
Hu üstu marcà sü, in sü un cartel: “Residenza Central Park”
Che nom ! Dumá a léngial a ta vegnan i sufaghìti !
Siché donca, stan ch’andéu, a ma paréa da sentì na zifuláa, e dadré 'na usi cha la disi: “Vá cá, merlu !”
Ma a ghé mìa da stremìsi. Ai hin dumá i uperai dul Balösu, ch’i vegnan föa tenme i lüserti pèna a gha vegn ultra i prüm sù da primaéa.
I sa sètan in si pancheti suta i pianti, e pèna i vedan un bel dadré i sa tran, dré a man, in pé.
Ma hu vardá pulidu: incö i panchèti ai hin vöi e a famusa dita dul Balösu a la gh’é pü.
Mo ai hin dré fa sü di palazi grandi, inscì grandi che par videi tüc’insema a ta tuca slungá ul col sina a stranguási.
I panchetti ai hin lì anmò, ma a gh’è nisön setá giù.
A ma par da vidèi ancamó, cun sü a müda blö, ch’i dörman in s’i panchèti stan ch’i specian a sièna, e i sa darsedan dumá chan cha gha passa na cai bela tusa, par zifulaghi dré.
Sti por uperai: chisá se, in due ai hin mo, i vedaán ancamó un cai bel dadré…. O dumá ul cimentu, tenme men.
Chi palazi lì han scüì daa vista ul lauá e a fadiga di oman, par lasaghi ul postu al “progresso”.
Ma se tül chi barbeláti lì i esan üstu a facia da chi oman ch’i durmiean in sü na pancheta, ripusasi dopu na meza giurnáa da fadiga, par me cöntu i girean i so rüspi, e i turnean indrè.
A tiá giü chel cartel lì, ul “central park”, a gh’a penseu men !

Soggetto:Cristina Puricelli, 1999
Redazione in lingua: Enrico Candiani, 2.1.2005