A gha vegnará chell dí - magara al é dumànn, magara fra cent'ann - ch' a ti se darsédi, e megn a sum pü li visén a tí.
A sum li pü par scultá cum' a te fiádi, a sum li pü per darsedati.
A sum li pü par dati un basén, na caézza sül cupén.
A sum li pü par scultá i to prèdighi, per capì i tó rasón, per sintí st'e gh'é da bisögn.
A sum li pü a scultá i tó ridái, a sügá i gutón di ögi.
Chell di lí, fami un piasé, sa ta vegn da caragná: fáll, inscí cum'al ta vègn, e pö metami in dun bel cantón dul tó cöi, lásami lá cüetu, e vá innanzi a fá i tó robi, a netá a tó cá. Tègnala tüta sbarlüsenta ‘ma a t’é sempu fèi.
Sa ta fá stá má non, pógia lá in dun cantón ul me litratu, magara visén a chell dul pá Ginu e dul to pá grandu ‘Ngiulèttu. Metassi lá tüci e trì in dun cantón mezu scundü, südanon a ta vègn ul magón tüci i mumenti e a la vá ben non: a ti sé püssé bèla chan te suridi che chan ch’a te fé i gutón di ögi.
Lássa andá in dul tó có chi pensé ch'a gha curi, da chandu a seam insèma, da chandu èmm fei un fiö, da chandu ul don Luigi al m'ha spusá, da chandu a sèm indèi a vidé un zicu ul mondu, sempu pian pianén, senza strafá.
Fa curi ul to tó có, e fermasi a pensá chandu te paegéi a scèna bèla ul sabatu da sìa, megn e tì, tì e megn, e i fiö da sùa a durmì o a fá rabèll.
Setasi giù a pensá áa nosta cá al mar, e i spassegiái fèi da sia e áa cursa fèi da matina, chèla cursa che sa féa par tignì cüieta a panscia (a me panscia, parchè tì a t’en ghéi mia, bela tusèta !).
Disténdasi in dul léciu e fá passá dananzi i tó ögi chi bèi sugnéti ch’a sa féa a bassúa di dí da festa, par tiá ul fiá di fadighi dáa salmána.
Ecula. Sa ti vöi fami cuntentu, fa curi in dul tó có chi robi chí, senza magón, ma cun dentu chel pó da cuntentezza che ul tó Ricö al é stèi bon da dati in dáa só vita.
Magara al é dumànn, magara fra cent'ann ....
